![](/images/virtuemart/product/2428da9a2dd5c56b1ea493811bbc2450.jpg)
Höfundur: Bubbi Morthens
ISBN: 656098
?? bls. Útgefandi: JPV (8. nóvember 2007)
Aðeins um verkið (fengið af síðu útgefenda)Hjá JPV útgáfu er komin út bókin Að kasta flugu í straumvatn er að tala við Guð eftir Bubba Morthens. Þetta eru sögur af mönnum og löxum; fallegar, ljóðrænar, fyndnar og einstöku sinnum naprar – sögur af veiðum, veiðiferðum og átökum við hina ástríðufullu og marglyndu veiðigyðju.
Í bókinni stíga fram margar og ólíkar persónur – næmir og fróðir veiðimenn og leiðsögumenn, vanir menn og óvanir, veiðifíklar sem leggja allt í sölurnar, fyllibyttur og banvænar ljóskur sem borða strákahjörtu í morgunmat, hrútfúll leigubílstjóri og einn sem lifði af útrýmingarbúðir og óralangt ferðalag fótgangandi yfir hálfa Evrópu í von um að verða einhvern tíma svo ríkur að hann gæti veitt lax.
Og svo eru það laxarnir, stórir og smáir, auðveiddir eða illskeyttir – sumir með alla orku heimsins og víðáttu hafsins ólgandi í blóðinu, aðrir stríðnispúkar sem hafa yndi af að leiða laxveiðimenn í ógöngur. Allir eiga þeir sína fulltrúa sem eru leiddir hér fram á sviðið til átaka við veiðimenn – og hvor veiðir hvorn?
„Þetta er ekki kennslubók um laxveiði, né heldur fjallar hún um tækniatriði eða hvernig eigi að veiða. Í þessari bók eru pælingar og sögur; sögur af mönnum og löxum, sögur sem ég hef veitt úr hyljum hugans,“ segir Bubbi í inngangskafla bókarinnar. Bubbi Morthens er sem kunnugt er mikill sögu- og veiðimaður og tekst hér frábærlega að flétta þessa eiginleika saman í skemmtilega og heillandi frásögn sem kitlar veiðimanninn í okkur öllum – líka þeim sem aldrei hafa kastað flugu í straumvatn.
Stofnaður 06.06.06
Hvernig gerast menn félagar í BMK?